pb 34 r
le conte de Bloiz et ses gens leverent le sciege. ¶ Le dit an le conte de Henau et son
oncle, messire Jehan de Haynau, et leur ost allerent en Frise pour le royaume conquerre, qui
appartenoit au dit conte. Mais parce qu’il ne voult croirre son dit oncle il fut tué lui
et ses gens. ¶ Ce dit an mourut le conte de Montfort.
GCF 5-36 sync Comment le conte de Norenthon, principal cappitainne des Angloiz, entra ens
Bretaingne a grant force de gens d’armez angloiz et print la Roche Darien en l’evesquie de Triguier
en Bretaingne.
En ce dit an le roy de France envoya le duc de Normendie en Gascoingne, contre
le conte d’Erby pour contre lui resister, et pour garder et deffendre les droiz
du royaume. Mais avant que le dit duc peust venir, le dit conte print le ville
et le chastel de Bergerart, ou estoit monseigneur Hemart de Poittiers, conte de Valentinoiz,
qui fut illeuc occiz. Et y fut navré et prins le conte de Lisle, en yssant de la ville. Et
fut prinse avec par le dit conte d’Erby la ville de La Riolle. Et fut fait par les gens du
païs si comme l’en disoit. Et pour ce retourna le dit duc dont son pere fut indigné. Si
retourna le dit duc. Et assiega Aguillon. Et lors ouÿ que le roy d’Angleterre guerrioit
son pere si retourna en France. GCF 5-37 sync ¶ Cellui an fut prinse la Roche Darien par le conte
de Northmenton, Angloiz, et destruisirent l’eglise catedral de Laudouenguer, ou estoit
le corps saint Yves. Et le firent les Angloiz pour ce que les Franchoiz n’y meissent
garnison. Et vouldrent encore les Angloiz destruire l’eglise catedral de Triguier.
Et ad ce faire commencha ung prestre qui mourut villainnement en mengant sa langue.
Et cryant comment un chien. ¶ Ce dit an voult le roy de France lever subcidez sur
les advoccas.
Comment le roy d’Angleterre vint en Normendie. Et print son chemin a Caen
et vint par Lisieux par Serigny a Vernon a Poissy. Et comment le roy de France le poursuioit
d’autrepart de Saine et vint logier a Paris, et les Angloiz passerent a Poissy.
Le premier jour de juillet, ce dit an, Symon Pillet, bourgoiz de Compiengne,
fut jugié a mort. Et fu sus ung escal es hallez de Paris comme char de boucherie
decouppé et desmembré, pour ce qu’il avoit dit que le droit du royaume de France
appartenoit mieulx au roy Edouart que a monseigneur Phlippe, roy de France. GCF 5-38 sync Et en ce temps
descendi le roy angloiz en Normendie. Et fut a Saint Lo en Costentin, ou il fist enterrer
solempnellement les testez des chevaliers qui furent decappités a Paris. Et fist pillier
la ville et ardoir le païs. Et somme ceulx de Caen de laissier le roy de France, et
de lui faire obeissance, lesquieulx n’obeirent pas, pourquoy il assigna bataille au
jeudi, au quel jour il print le ville, nonobstant que plusieurs nobles, contes, barons
et aultrez ensemble avec ceulx de la ville se deffendissent de grant poissance. Et les
print prisonniers et les envoya en Angleterre. C’est assavoir le connestable de France
le chambellenc du roy, le conte de Tancarville, et plusieurs aultrez. Aucuns si se
trayrent au chastel, puis fut pillee la ville. Et aprés s’en alla le roy angloiz a Lisieux.
Et Godeffroy de Harecourt si alloit au devant.
Comment le roy d’Angleterre parti de Poyssy. Et bouta les feux es manoirs royaus.
et s’en alla vers Picardie. Et comment le roy de France retourna a Anthoigny
et passa par Paris a grans souspirs disant qu’il estoit trahy et poursuiant son ennemy.
Aprés vindrent les Angloiz vers Faloize, ou ilz trouverent viguereuse resistence
et retournerent vers Rouen. Et quant ilz sceurent que le roy de France assembloit son
ost, il s’en allerent au Pont de l’Arche. Toutteffoiz le roy de France y alla devant pb 34 v