The Online Froissart

Facsimile mode Settings Browse | Collate

pb 4 r
a femme la seur germainne du viel roy Phlippe. Et avoit tousjours esté son plus especial
compaignon et ami en tous estas. Et fut bien l’espace de trois ans, que en France
avoit esté par luy tout fait, et sans ly n’estoit riens fait. Et aprés advint que le roy
Phlippe emprist et acueilly ce messire Robert, en si grant haingne a l’occasion d’un plet
qui esmeu estoit devant ly dont le conte d’Artoys estoit cause, que le dit messire Robert
voulloit avoir gaingné par la vertu d’unne lettre que le dit messire Robert mist avant
qui n’estoit mye bien vraye, si comme l’en disoit, que se le dit roy l’eust tenu en son pouoir
il l’eust fait mourir sans nul remede. ¶ Et comme le dit messire Robert fust le plus
prouchain a tous les barons de France et serourge au dit roy si luy couvint il vuidier
France et venir a Nammur deléz le jeune conte son nepveu et son frere qui estoient enffans
de sa suer. ¶ Quant il fut departi de France, et le roy vit qu’il ne le pourroit tenir
pour mieulx que la besoingne luy touchoit il fist prendre sa seur qui estoit femme du dit
messire Robert, et ses deux filz qui estoient ses nepveux, Jehan et Charles. Si les fist mettre en
prison bien estroittement, et jura que jamaiz n’en ystroient tant qu’il vivroit. Et bien tint
son serment. Car oncques depuis pour personne qui en parlast ilz n’en vuiderent dont il
en fut depuis moult blasmé par derriere. ¶ Quant le roy de France sceut de certain
et fut informé que messire Robert d’Artoiz s’estoit arresté devers sa seur la contesse de
Namur et ses enffans ses nepveux, il en fut moult courouchié. Et envoya chaudement
devers l’evesque Raoul du Lyege, en luy priant, qu’il deffiast et guerroiast le conte de Namur
s’il ne mettoit messire Robert d’Artoys en sus de lui. ¶ Cel evesque qui amoit moult
le roy de France et qui petit amoit ses voisins, manda au jeune conte de Nammur qu’il
meist son oncle messire Robert d’Artoys hors de son paÿs et de sa terre, ou autrement il
lui feroit guerre. Le dit conte de Namur fut si conseillé qu’il mist hors de sa terre son dit
oncle moult envis. Mais faire luy couvenoyt ou pis attendre. ¶ Quant messire Robert
d’Artoiz se vit en ce parti si fut moult angoisseux de cuer. Et s’avisa qu’il yroit en Brebant
pour tant que le duc son cousin si avoit espeousee la seur au dit roy, et seur de la femme
messire Robert d’Artoiz, qui estoit si poyssant que bien le soustendroit.²⁴ ¶ Si vint devers
le duc, son cousin, qui le rechupt moult lyement. Et le reconforta assés de ses encombriers.
Le roy le sceut, si envoya tantost messagiers au dit duc. Si lui manda que il soustenoit
out souffroit le dit messire Robert nullement, ne a repairier en sa terre, qu’il n’aroit pire
ennemy de ly, et le greveroit en touttes les guises qu’il pourroit. ¶ Le dit duc ne le
voult ou n’osa plus soustenir ouvertement ne couvertement en son pouoir pour doubtance
de acquerre la hayngne du roy de France. Ains l’envoya couvertement tenir en une
place nommee Argenteuil, jusques a tant que l’en verroit comme le roy se maintendroit.
¶ Le roy sceut que le dit messire Robert estoit a Argenteuil qui par tout avoit ses
espies, si en oult moult grant despit. Si pourcacha tant et a moult brief temps aprés par son
or et par son argent que le roy de Behaingne qui estoit cousin germain du dit duc,
l’evesque du Lyege, l’archevesque de Couloingne, le duc de Guerles, le marquis de
Villiers, le conte de Barbe, le conte de Los, le sire de Fauquemont, et pluseurs aultres seigneurs
qui tous furent alyés encontre le dit duc. Et le deffierent tous au pourchas et requeste
du dessus dit roy de France. Et entrerent tantost en son paÿs parmi Esbaing et allerent droit
a Hannie. Et ardirent a leur volenté par deux foiz tous les demourans en ce païs tant
comme bon sembla aux seigneurs dessus diz. Et envoya avec eulx le dit roy Phlippe le pb 4 v

Display By:	Folio Manuscript Chapter SHF Chapter

Manuscript:
Navigate By:	Folios Manuscript Chapters Edition Chapters
Go To:

Return to Manuscript

Facsimile	Manuscripts are displayed with a layout and visual style which reflects the original manuscript as closely as possible.
Edition	Manuscripts are displayed in a more readable style resembling a modern edition.
Synchronise by word	Every collated word becomes a link. Clicking on a word will synchronise all open manuscripts to that word.
DMF	With this setting, every word becomes a link to the online Dictionnaire du Moyen Français (DMF). Clicking on a word opens a window listing relevant entries on the DMF website.

Horizontal	Viewing windows extend horizontally across the page.
Vertical	Viewing windows extend vertically down the page.