pb 1 v
et nobles qui les ensuivront, s’il le vault, et lui aideront et avanceront,
s’il le dessert, et le pourverront selon son bienfait. Aussi en armes
adviennent tant de grans merveilles et de belles adventures qu’on
ne oseroit ne pourroit penser ne ymaginer les fortunes qui se boutent,
si comme vous verréz et trouveréz en ce livre, se vous le liséz, comment
pluseurs chevaliers et escuiers se sont faiz et avancé, plus par leur
proesse que par leur lignage. ¶ Le nom de preux est si hault et
si noble et la vertu si belle et clere que elle resplendist en ses
salles et en ces places ou il y a assamblee et foison de grans seigneurs,
et se remonstre dessus toutes les autres. ¶ "Voyés la cellui qui mist ceste
chevauche ou celle armee sus, et qui ordonna ceste bataille si faictissement
et la gouverna si sagement, et qui jousta de fer de glaive si roidement,
et qui tresperça les conrois de ses ennemys par deux ou par trois foys,
et qui se combatit si vaillaument ou qui entreprinst ceste besoigne
si hardiement, et qui fut trouvé entre les mors et les blecéz,
navrés moult durement, et ne daigna oncques fuir en place ou
il se trouvast." ¶ De telz grains et de telz semences sont serviz et
alloéz li vaillans hommes et les preux par leur vaillance. Encores
avant on veoit le preux bachelier seoir a haulte honneur a table
de roy, de prince, de duc et de conte, la ou plus noble de sang ou plus
riche d’avoir n’est mye assis. Car, si comme les quatre evangelistes
et les douze apostres sont prochains de Nostre Seigneur que ne sont les
autres saintz, sont les preux plus pres d’onneur et plus honnourés
que les aultres, et c’est bien raisons. Car ilz acquierent et conquierent
le nom de prouesse en grant peinne, en labeur, en soing, en veiller et
travaillier jour et nuyt sans repoz et sans sejour. Et quant leur
bienfait est veü et cogneu, il est ramentoié et renommé si comme dessus
est dit et escript es registres en livres et en croniques. Car, par les
escriptures trouve on en memoire des bons et vaillans hommes jadiz,
si comme les neuf preux qui passerent route par leur proesse,
les douze compaignons chevaliers qui garderent le pas contre
Saladin et sa puissance, les XII paers de France qui demourerent
en Rainchevaux, et qui si vaillaument se combatirent. Et ainsi
de tous les autres que je ne puis mye determiner leurs biens
faiz remantoer. Car trop pouroie ma principale matiere empechier.
Ainsi se differe et dissimule le monde en plusieurs manieres.
Les vaillans hommes travaillent leurs membres en armes, pour
avancer leurs corps et acroistre leur honneur. ¶ Le peuple parle,
recorde et devise de leurs estaz et fortune. Les aucuns clers escripvent
et enregistrent leurs adventures et leurs bacheleries. ¶ Or ay je eu
plusieurs fois imagination sus l’estat de proesse, et pensé comment elle
a regné et tenu seignourie et domination, et sailly d’un paÿs en ung
autre. Sus ces ordonnances mesmement, en ay je parlé et divisé en ma
jeunesse a aucuns vaillans hommes et bons chevaliers, qui aussi bien que moypb 2 r