pb 274 r
et de madame Ysabel, fille au duc Estienne de Baviere; car le roy Charles de
France, de bonne memoire, ou lit de la mort avoit ordonné que Charles, son filz
feust assené et marié, se on pouoit veoir lieu pour lui en Alemaigne, par
quoy des Alemans plus grandes aliances se feissent aux François, car il
veoit que le roy d’Angleterre estoit marié a la seur du roy d’Alemaigne, dont
il valoit mieulx. La duchesse de Braibant qui estoit une dame bien ymaginant,
toutes ces choses remonstra au roy et a ses oncles et a son conseil en celle
cité de Cambray, commant celle jeune dame estoit fille d’un grant seigneur
en Alemaigne et le plus grant des Baviers, et que grans aliances s’en feroient
aux Alemans, et pouoit le duc Estienne rompre trop de propos des haulx
seigneurs en l’Empire, car il y estoit aussi grans ou plus que le roy d’Ale
maigne. Ce fut la condicion qui plus enclina le conseil de France a perse
verer en celle besongne et touteffoiz il fut moult secretement demené,
et en sçavoient trop petit de gens a parler jusques a tant qu’il fut fait.
La raison pourquoy, vous l’orréz. Il est d’usage en France, que quelconque
que ce soit, tant soit fille de grantt signeur, soit advisee et regardee toute
nue par dames, a sçavoir se elle est propice et formee a porter enfans.
Oultre plus, pour ce que celle dame estoit de loingtain paÿs, si comme de Ba
viere, elle amenee en France, on ne sçavoit se elle seroit a la plaisance du roy,
autrement ce estoit tout rompu. Pour ces raisons furent ces choses tenues
en secret, et fut environ la Penthecouste amenee en Brabant, deléz la duchesse,
qui la receut joieusement et qui l’ordonna a l’usage de France. Et estoit en sa
compaignie le duc Frederic de Baviere, son oncles, et par lequel le mariage, au
voir dire, estoit premierement promeu, par la maniere et raison que je vous diray.
SHF 2-447 sync Quant le duc Frederic de Baviere vint premierement en France et il fut
devant Bourbourc ou service du roy de France, voir est qu’il fut festié et
conjoy du roy et des royaulx moult grandement pour la cause de ce qu’il estoit
venu servir le roy de loingtain paÿs de Baviere qui est plus de IIC lieues loing. Si
tindrent du dit duc le service a grant, et fut tousjours logié moult prés du roy a
cause d’amour et acompaigné de ses oncles. Et quant il se partit de Baviere, il cuida
certainement que le roy de France et le roy d’Angleterre deussent avoir en la marche
de Flandres bataille adrecee ensemble, si comme la voix et la renommee couroient
adonc par toute Alemaigne. Et pour ce lui en sçavoient le roy de France et ses
oncles plus grant gré. Et estoit advenu lui estant en ce voiage de Bergues et
de Bourbourg, que les oncles du roy, ainsi que seigneurs devisent, ensemble
lui avoient demandé moult amiablement s’il avoit nulle fille a marier
et que il convenoit une femme au roy de France, et plus cher l’aroient ilz a
marier en Baviere que ailleurs, car ceulx de Baviere anciennement ont tous
jours esté du conseil de France. A ces paroles avoit respondu le duc Frederic
et dit que nenil, mais son frere ainsné le duc Estienne de Baviere en avoit
une belle. "Et de quel aage?" avoient demandé les oncles du roy. "Entre XIII et
XIIII", respondit le duc Frederic. Donq dirent les oncles du roy : "C’est tout ce
qu’il nous fault. Vous retourné en Baviere, parléz en a vostre frere et amenéz
vostre cousine en pelerinage a Saint Jehan d’Amiens, et le roy sera en sa presence. pb 274 v