porter dommage; ilz congneurent clerement que ilz les convenoit partir de
la et traire quelque part que ce feust, a sauveté, si ilz ne voloient estre mors ou pris. Si eurent
conseil de partir et de tourser ce que porter en pourroient, et laissier la bastide. Si comme ilz
l’ordonnerent pour le mieulx, ilz le firent, et tourserent tout, et monterent sur leurs chevaulx, et
laissierent la bastide, et se mistrent aux champs et prinrent le chemin de
Hainbon,
ou il n’y a que quatre lieues de la; ilz ouvrerent saigement de cela faire et de
monter sur leurs chevaulx et de partir, car ilz n’avoient garde que les
Englois les
poursieuvissent, pour tant que ilz n’avoient encore trait nulz chevaulx hors de leurs nefs. Messire Jehan Malatrait et les chevaliers et escuiers qui avec lui estoient vinrent celle nuit
a
Hainbon. Si se bouterent dedens et la trouverent toute ouverte et appareilliee;
la n’avoient ilz garde des
Englois. Quant ce vint au matin, on sonna trompetes
pour armer l’ost et traire a l’assault, et voloient trop bien faire la besongne, mais nouvelles vinrent
que les
Bretons estoient partis et avoient guerpy la bastide; dont se repentirent
les
Englois grandement de ce que ilz avoient oublié a mettre une embusche
![](i/link2.gif)
sus, par quoy ilz n’eussent pas ainsi perdu leur proie. Si
envoierent les seigneurs desemparer la bastide, et bouterent le feu dedens les varléz qui estoient
tailliéz de cela faire. Ainsi furent levees par le duc de Lancastre les bastides de
Brest, et ce jour alerent veoir, le duc et messire Jehan de Hollande
et les seigneurs, aucuns et non pas tous, le
chastel de Brest, et y amenerent les dammes,
et y burent et mengierent, et puis se retrairent a leurs logeis; et l’endemain, le tiers
jour, on rafreschi les nefs d’yau doulce, et au quart jour ilz se retrairent dedens et
se desancrerent, et se departirent.
Ce quart jour que ilz avoient esté logiéz sur les champs
au dehors de
Brest, ilz avoient eu conseil ensamble, le duc et les
seigneurs et les maronniers de
Portingal qui y furent appeliéz, pour savoir quelle
part ilz se trairoient ne ou terre ne port ilz prenderoient, ne se ilz vroient a
Luscebonne ou au
Port de Portingal, ou se ilz prenderoient terre en Bisquaie ou a La Calongne; et furent sur cel estat le duc et les seigneurs longuement en conseil ensamble, et en fu demandé a Alphons Vretat,
le maistre des navires au roy de Portingal. Il respondi et dist: "Messeigneurs,
pb 108 v