doulcement, ou se vous vous feréz assaillir et prendre de force et tous destruire." "Monseigneur," respondi le cappitaine, "donnéz nous ung petit de loisir
pour parler ensamble, et nous vous en responderons tantost." "Je le vueil", dist
le mareschal. A ces mos se traist le cappitaine a part et rentra en
la ville, et vint en la place acoustumee, ou toutes gens se retraient pour estre ensamble,
et la fist il venir toutes les gens de la ville. Quant ilz furent tous venus, il leur remonstra
moult saigemeut et leur dist et compta de point en point toutes les paroles que vous avéz oyes,
et me samble et voir fu finablement que ilz furent d’acord de recepvoir le duc et la duchesse paisiblement comme leur seigneur et damme, et les tenroient en la ville
tout comme ilz leur plairoit a estre, se la puissance du roy Jehan de Castille ne les en
ostoit et levoit, mais se il avenoit ainsi que, quant ilz aroient esté la et sejourné ung
an ou deux ou a leur plaisance, tant et si petit comme il leur plairoit a estre, et ilz
se departesissent du paÿs et se retraissent en
Engleterre, ou a
Bourdiaux, ou a
Baionne, ou autre part, la ou ilz
![](i/link2.gif)
leur
plairoit le mieulx, se le duc les laissoit si bien et si fort pourveüs de bonnes gens d’armes
que pour eulx tenir et garder contre les ennemis, et
par celle faulte que point
ne seroient pourveüs ne garniz, ilz renderoient la ville et metteroient arriere ens es mains
du roy Jehan de Castille ou de ses mareschaux, ilz voloient estre quittes de
leurs fois. Ces traitiéz accepta liement messire Thomas Moriau, et dist que ilz parloient
bien et a point, et que le duc et la duchesse ne demandoient mieulx. Lors
retourna le mareschal devers ses gens, et puis s’en ala devers le duc et la duchesse qui l’attendoient sur les champs; si leur recorda tous ces traitiéz, ausquelz ilz ne
contredirent riens, mais les tinrent a bons et bien fais. Si chevauchierent liement, si comme je vous
ay cy dessus dit et compté, et en ordonnance de bataille en trois arois jusques a la
ville de Saint Jaques.
Environ deux petites lieues françoises de la
ville de
Saint Jaques en Galice, vinrent au dehors a pourcession tout le clergié de la ville,
et portans dignes reliques, croix et confanons, hommes, femmes et enfans, contre la venue du duc et de la duchesse, et aportoient les hommes de la ville avecques eulx
les clefs des portes, lesquelles ilz presenterent de bonne volenté par samblant, je ne sçay se il estoit
faint ou vray, au duc et a la duchesse, tout en genolz,
pb 112 r