asséz", dist le mareschal. "Je ne vueil mieulx. Avant que il soit ung an la determinacion en sera faite, car la couronne et l’iretaige de Castille, d’Espaigne, de Corduan, de Galice et de Sebille demora au plus fort. Et appert en ce païs dedens l’entree en la fin du mois d’aoust des armes biaucop et une aussi grosse journee de bataille que il ot point en Castille depuis cent ans." "Bien, monseigneur," dist le preudomme, "il en aviengne ce que il puet avenir et le droit voise au droit, Nous, en ce païs de Galice, en oserons bien attendre l’aventure." A ces mots furent les sains aportéz; si jurerent ceulx qui la ville de Bayone avoient a gouverner pour les jours, a estre bons, loyaux et feables si comme bons subgetz doivent estre a leur seigneur et damme, que ilz le seroient a monseigneur de Lancastre et a madamme, et les tenoient et recongnoissoient a seigneur et damme comme les autres villes de Galice. Et le mareschal ou nom du duc de Lancastre les receupt ainsi et leur jura a tenir et garder en paix et en justice. Quant toutes ces choses furent faites, jurees et promises a tenir, on ouvri les barrieres et puis la porte. Si entrerent toutes manieres de gens dedens, et s’espardirent parmi la ville et se logierent. La ville est grande asséz pour eulx