ces parolles; aussy faisoit la duchesse, car ilz y estoient
present. Adont leur dist
Soustree: "Avanciéz vous, car vesla vostre
seigneur et vostre dame." Lors s’avancherent ces VI
hommes et se misrent aux genoulx et parla l’un d’eulx ainsi et dist: "Mon tres
redoubté seigneur et ma tres redoubtee dame, la communaulté de la ville de
Besances nous envoye ycy. Ilz ont entendu que vous venéz sus eulx ou envoiéz a main armee
pour avoir la seignourie. Si vous prient de grace especial que vous voz vueilliéz souffrir et cesser
LX jours tant seullement de non faire assaillir, et ilz envoyeront devers le roy
de Castille, qui
se tient au Val d’Olif, et luy
remonstreront le dangier ou ilz sont, et, se dedens les IX jours ilz ne sont secourus
de gens d’armes fors asséz pour vous combatre, ilz se mettront du tout en vostre obeïssance. Et
le terme que vous et vos gens logeréz pres de ychy, se vivres ou pourveances vous besoingnent,
pour voz deniers, chiers sires et vous tres chiere dame, ceulx de la ville
de Besances vous en offrent a prendre a vostre voulenté pour vous et pour voz gens. "
¶ A ces parolles ne respondy point le duc a eulx, mais laissa la duchesse parler qui tres bien avoit entendu leur langaige, car elle estoit du paÿs, et regarda
sus le duc et dist: "Monseigneur, qu’en dittes vous?" "Et vous
dame aussy
qu’en dittes vous? vous estes heritiere; la
Caloigne me vient de vous; s’en devéz respondre." "Monseigneur
c’est bon qu’ilz soient respondu et qu’ilz soient receu parmy le traittié qu’ilz mettent avant, car
je croy bien que Jehan de Tristemaire, le introdus de Castille, n’a nulle
voulenté de si prestement vous combatre." "Je ne say", dist le duc; "Dieu doinst que il viengne a la bataille tost; si serons nous tant plus tost delivré, car je vouldroye
que ce fust dedens six jours. Et puisque vous le vouléz, je le vueil aussy."
Adont se retourna la dame devers les hommes, et leur dist en galissien: "Aléz; vous
avéz exploittié, mais delivréz au mareschal de voz hommes de la ville des plus
notables jusques a XII, qui soient plesge pour tenir le traittié." "Bien,
madame", respondirent ceulx de la dicte ville. Adont se leverent ilz, et
messire Jehan Soustree fut esleus et char
giéz, qui amené les avoit,
de faire toutte ceste response au mareschal, lequel mareschal s’en contenta
bien, quant ilz furent retourné vers luy. Et cilz s’en alerent a
Besance et
compterent comme ilz avoient exploittié.
¶ Adont furent prins en la ville XII hommes des plus notables et
envoyéz devers le mareschal. Si demoura la ville de Besances en paix parmy
la condicion que je vous baille; et tantost ilz envoyerent, quant ilz eurent parlé ensamble et ilz se
furent conseillié
pb 166 v