a savoir comment ilz feroient. Ces propres
six hommes et non aultres se trairent devers le roy de Castille, les quelx
avoient fait le traittié au duc de Lancastre; et cheminerent tant qu’ilz vindrent au Val d’Olif, ou le roy se tenoit et une partie de son conseil.
Quant ilz furent venus et le roy sceut leur venue, il les voult veoir pour parler a eulx et
pour demander des nouvelles; car encoires ne savoient ilz riens de la composicion que ilz avoient
fait au duc de Lancastre, et que les
Anglois fussent venus devant
Besanches.
SHF 3-142 sync
Entreus que ces six hommes
allerent au Val d’Olif pour parler au roy, si comme vous savéz,
ordonna le duc de Lancastre sa femme et sa fille, madame Katheline,
pour aler au Port veoir le roy de Portingal et la jonne royne sa fille, et luy dist ainsi le duc au departir: "Constanche, vous
me salueréz le roy mon filz et ma fille et les barrons de
Portingal, et leur dittes des nouvelles telles comme vous savéz; comment ceulx de Besances sont en traittiéz devers moy et ne say pas encoires comment ilz sont fondéz, ne se nostre
![](i/link2.gif)
adversaire Jehan de Tristemare leur a fait faire ce traittié, ne se il
nous vendra combatre; car bien say que grant confort luy doit venir de France
et vendra, puisque le voyaige de mer est rompus et que chevaliers et escuiers de France qui
desirent les armes et eulx a avanchier vendront en
Castille du plus tost comme ilz
porent. Si me fauldra tous les jours estre sus ma garde pour attendre
la bataille. Et tout ce diréz vous au roy mon filz, et aux barrons de
Portingal; et, se aulcune chose m’accroist, ou que je voy que je doy avoir a faire de ayde, je le
signifieray sus heure au roy de Portingal. Si luy dittes depar moy qu’il soit ainsy
pourveüs que pour aydier a garder nostre droit et le sien, si comme nous avons par alliance juré
et promis ensamble. Et oultre, vous retourneréz devers moy mais vous lairéz celle saison nostre fille Katheline deléz la royne sa suer au
Port de Portingal;
elle ne peut mieulx estre ne en meilleur garde." "Monseigneur,"
respondy la dame, "tout ce feray je voulentiers."
¶ Lors prinst congié la duchesse au duc et sa fille et les
dames et damoiselles qui en leur compaignie estoient, et monterent aux chevaulx et se departirent;
et furent accompaigniéz de l’amirault missire Thomas de Persy, messire Yon Fil
Warin, du seigneur de Thalebot, de messire Jehan d’Aubrecicourt, et de
messire Maubruny, et leur furent delivréz C lances et II
C archiers. Et chevaulchererent vers le Port de Portingal, et tant
esploittierent que ilz y parvindrent ou asséz prez.
Quant le roy de Portingal entendy que la
duchesse de Lancastre et sa fille venoient,
pb 167 r