Ilz s’assamblerent, et quant ilz furent tous
assambléz, ilz parlementerent, et les plus notables remonstrerent a la communaulté
touttes les parolles que vous avéz oyes. Si furent d’accort que ilz renderoient la ville,
et racheteroient leurs hostagiers qui en prison estoient, car ilz ne les vouloient pas perdre.
Si retournerent au mareschal et distrent ces nouvelles, en disant: "Mareschal, en toutes voz demandes n’y a que raison. Nous sommes appareilliéz de recepvoir
monseigneur et madame, et de eulx mettre en la possession de ceste ville, et vecy les clefz; nous nous en yrons avec vous devers eulx en leurs logeis, mais que il
vous plaise et que vous nous y vueilliéz mener."
Respondy le mareschal: "Oïl, voulentiers." Dont yssirent hors de
Besances bien eulx LX et emporterent avecques eulx les clefz des
portes, et le mareschal les mena tout droit au duc, et fist pour eulx l’entree
et la parolle.
Le duc les requeilly et leur rendy leurs hostages, et entra ce jour en la cité
de Besances et se y loga, et y logierent touttes ses gens qui logier y pouoient.
Au chief des quatre jours, apréz ce
que
Besances se fu rendue au duc de Lancastre, retournerent les six hommes, lesquelx avoient esté
envoiéz au Val
d’Olif devers le roy de Castille. Ilz furent enquis et demandé de ceulx de
la ville pourquoy ilz avoient tant demouré. Ilz respondirent qu’ilz ne les avoient peut
amender. Bien avoient parlé au roy et respondy le roy, quant il les avoit oÿs
et entendus, que
ilz se conseilleroient sus pour donner response, et "pour ce sejournames nous
la VIII jours, et encoires sommes nous retournéz sans avoir response." On
ne leur demanda plus avant, mais ils distrent bien que on disoit au Val d’Olif que
le roy de Castille attendoit grant gens qui venoient de France; et ja en
y avoit venus grant foison, qui estoient logéz sur le païs et se logoient tout a la mesure
qu’ilz venoient. Mais encoires estoient les cappitaines, messire Guillaume de Lignac et
messire Gautier de Pasach derriere, et les grosses routes, et estoient ja sus
le chemin la greigneur partie des chevaliers et escuiers qui en Espaigne devoient
aler avecques les dessus dis cappitainnes; mais ceulx qui estoient escrips et detenus de
la routte du duc de Bourbon estoient encoires en leurs hostels.
SHF 3-144 sync
¶ Or passoient messire Guillaume de Lignac et
messire Gautier de Pasach tout oultre le
royaulme de France de la Languedoc, et entrerent eulx et leurs gens en la Languedoch et estoient
plus
pb 168 v