de Jullers, qui maint annoy luy avoient fait.
¶ Si se departi de
Brouxelles en grant arroy ou elle se tenoit, le conte de
Saumes en Ardanne en sa compaingnie, le seigneur de Cocelar aussy, et le seigneur de Bouquehourt et pluseurs aultres, pour venir en
Lucembourch et la veoir le roy et parler a luy. Et passa
la Meuse au pont a Huy et chemina tant par ses journees que elle vint a
Bastongne, et la s’arresta; car le roy devoit passer par la ou auques prez, si comme il
fist; car, quant il se departi de
Grant Pret, il vint passer
la Meuse a Morsay, et tout l’ost aussy, mais leurs journees estoient petites
pour les raisons qui sont dessus dictes.
¶ Or vindrent ces nouvelles, car elles voloient partout, en la
duchié de Jullers, que le roy de France les venoit veoir a plus de C
M hommes, ne
onques il n’en y eust si grant peuple ensamble, se ce ne fut quant il vint a
Bourbourch ou il cuida bien la puissance d’
Angleterre plus grande
![](i/link2.gif)
qu’il ne le trouva, deust estre.
¶ Le duc de Jullers, par especial, se commencha fort a doubter, mais le duc de
Guerlles n’en fist compte et dist: "Or laissiéz les venir. Plus venront avant, et plus se
lasseront et affoiblieront leurs pourveances; et s’est sus l’iver, et je sejourne en fort paÿs.
Ilz n’y entreront point a leur ayse et si seront reveilliet a la fois, aultrement que de
trompettes. Il leur fauldra tousjours estre ensamble, ce qu’ilz ne pourront faire, s’ilz vueillent
entrer en mon paÿs; et, se ilz se desroutent, nos gens en auront, s’ilz vueillent ou
non. Mais toutesfoiz, au voir dire, nostre cousin de France est de bonne voulenté et
de grant emprinse, car il monstre et fait ce que je deusse faire. "
¶ Ainsi se devisoit le duc de Guerlles a ses chevaliers, et le duc de Jullers, son
pere, pensoit aultrement et estoit tous esbahis, car il veoit bien que, se les
François vouloient, toutte sa terre seroit arse et perdue. Si manda son
frere, l’archevesque de Coulongne, et son cousin, l’evesque de Liege, messire
Arnoul de Hornes, pour avoir conseil d’eulx et pour savoir comment il y porroit
remedier, a la fin que sa terre ne fust point essillié ne gastee.
¶ Ces deux prelats le conseillierent a leur leal pouoir, et bien y avoit
cause, et luy distrent que il luy convenoit humelier envers le roy de France et des ses oncles et venir; a obeïssance.
¶ Le duc leur respondi que tout cela feroit il tres voulentiers.
pb 304 v