compte.
Par ce point fu la guerre du
pape Clement plus laide, car oncques puis messire
Ostes ne s’en voult ensongnier. Aussi Marguerite de Duras, qui se tenoit
a Gayete et qui estoit adversaire a la royne de Naples, la femme qui fu au
roy Loÿs, duc d’Anjou, le manda pour aidier a faire sa guerre contre les
Neapolitains. Si se dissimula ung temps le dit messire Ostes et ne savoit lequel faire.
Aucuns de son conseil li boutoient en l’oreille que il se tenist daléz Marguerite
de Duras, qui estoit hiretiere de
Naples et de Cecille,
et li aidast a deffendre et garder son hiretaige, et la presist a femme, car elle le voloit bien avoir
a mary, pour tant que il est de noble sang et de haulte estracion, et se fesist roy et sire des paÿs
dont elle se clamoit dame; et les autres li conseilloient que non et que il en porroit bien prendre
ung mauvais coron, car l’enfant du roy Loÿs, qui avoit esté couronné en la cité de
Bar, estoit jone et avoit grant foison de bons amis et de prouchains, et avoit pluseurs freres, et par especial le roy de France leur cousin germain, qui les vouloit aidier,
et leur damme de mere, la royne Jehanne et duchesse d’Ango et du Maine,
laquele estoit de grant pourchaz. Toutes ces doubtes li remettoient aucuns de son
conseil devant, pourquoy messire Ostes se dissimula ung temps et ne obtenoit ne
l’une partie ne l’autre.
SHF 3-66 sync
![](i/link2.gif)
¶ En ce temps avoient enclos en la
cité
de Peruse cellui qui s’escripsoit pape Urbain les soudoyers du
pape Clement qui se tenoit en
Avignon, le sire de Montiere, ung moult vaillant
chevalier de la conté de Geneve et de Savoie, et messire Thalebart, ung chevalier de
Rodes, et messire Bernard de La Sale, et fu la moult astraint le dit pape
et pres sur le point que d’estre pris, et ne tint que a XX
M frans, si comme
je fus adont informé, que ung cappitaine alemant tenant grans routes, qui s’appelloit le conte
Conrart, l’eust delivré aux mains des gens le
pape Clement, se il les eust euz, dont
messire Bernard de La Sale en fu envoié en
Avignon, et remonstra tout
ce au pape et aux
cardinaulx, mais on n’y pot entendre tant que a delivrer la
finance, car la court estoit si povre que point d’argent n’y avoit, et retourna messire Bernard mal content au siege de
Peruse. Si se dissimulerent les choses et les Perusiens; aussi ce conte Conrart, et yssi
pb 79 r