pb 242 v
voirs est que il feust festiéz et conjoiz des oncles du roy et des royaulx
moult grandement, pour la cause de ce que il estoit venuz servir le
roy de loing païs de Baviere et de plus de deux cens lieues loing.
Si tindrent du dit duc le service a grant, et fut tousjours logiéz
moult pres du roy, en cause d’amour, et acompaignéz des oncles
du roy, et quant il se departy de Baviere, il cuida certainement
que le roy de France et le roy d’Angleterre deussent avoir en la
marche de Flandres ou de France bataille adressee ensemble, si comme
la voix et renommee couroient adonc par toute Alemaigne. Et pour
ce en savoient le roy de France et ses oncle plus grant gre. Et estoit
avenu, estant en ce voiage de Berges et de Bombourc, que les oncles
du roy, ainsi que seigneurs se devisent ensamble, lui avoient moult
amiablement demandé se il avoit nulle fille a marier, et que
il convenoit une femme au roy de France, et plus chier l’aroient
il a marier en Baviere que ailleurs. Car les Baviers anciennement
ont tousjours esté du conseil de France. A ces parolles avoit
respondu le duc Fedris et dist que nennil, mais son frere ainsné
le duc Estienne de Baviere en avoit une belle. "Et de quel aage?"
avoient demandé les oncles du roy. "Entre treize et XIIII ans,"
avoit respondu le duc Fedris. Dont dirent les oncles du roy :
"C’est tout ce que il nous fault. Vous retourné en Baviere, parléz
en a vostre frere et admenéz vostre cousine en pelerinage a Saint Jehan
d’Amiens, et le roy sera contre lui, se il le veult, espoir la desirera il.
Car il voit voulentiers toutes belles choses et les ayme. Et, se
elle lui haiste a avoir, elle sera royne de France." Ainsi alerent
les premieres convenances, ne plus n’y ot dit ne fait. Et n’en
savoit riens le roy de France que on eust parlé de son mariage.
Et quant le duc Fedris fut retourné en Baviere, il remonstra
toutes ses parolles a son frere le duc Estienne, qui pensa moult
longuement sus, et lui respondi : "Beau frere, je croy moult bien
que il soit ainsi que vous me dictes, et ma fille seroit bien
eureuse, se elle pouoit escheoir ne venir a si hault honneur
comme d’estre royne de France. Mais il est moult loings d’icy,
et si y a trop grant regard a faire une royne et femme du roy,
si seroye trop courrouciéz, se on avoit menee en France ma fille,
et puis elle me feust renvoiee. Je ay asséz plus chier que je
la marie a mon ayse deléz moy." Ce fut la response que le duc
Estienne avoit donnee a son frere, de quoy le duc Fedris s’en
contentoit asséz, et en avoit escript auques sus celle forme
aux oncles du roy, a son oncle le duc Aubert et a madame
de Braibant, ausquelz il en avoit parlé a son retour, et cuidoit
bien que on eust mis en nonchailloir toutes ses choses, et aussi
on parloit du mariage du roy ailleurs, et se fust asséz pb 243 r