pb 165 ret esplecterent tant qu’ilz vindrent en
la ville de Saint Jacques dont ilz estoient
partiz, et retournerent devers le duc et la duchesse, qui leur demanda des nouvelles
et ilz en recorderent ce
qu’ilz en avoient veü et qu’ilz en savoient et que le roy de
Portingal les saluoit et
la rayne se recommandoit a eulx. Et disdrent encore
missire Jehan de
Hollandes et missire Thomas de Persi: "Monseigneur, la
derraine parolle que le roy de Portingal nous dist fut telle: que vous
trayer sur les champs quant il
vous plaira car il se tirera aussi o toute sa puisance
et entrera en
Castille." "Ce sont bonnes nouvelles ce," dist le duc. Environ quinze
jours aprés ce que le connestable et l’amiral furent retournéz du
Port et des
noces du roy de Portingal, se ordonnerent le duc
de Lancastre et ses gens pour
chevauchier et aller conquerir villes et chasteaux en
Galisse. Encores n’en
estoit pas le duc seigneur de tous ne de
touttes villes et fut ordonné du conseil
du duc et il appartenoit qu’il fust ainsi que
quant le duc partiroit de la ville
de Saint Jacques, la duchesse
et sa fille Kateline en
partiroit aussi et en
yroit au Port voir le roy de Portingal et la jeune rayne. Si furent ainsi ordonnés les
besongnes comme du duc, et de leur jeune fille aussi. Et fut la ville de Saint
Jacques a ung chevalier
d’Angleterre baillee a garder et pour estre capitaine lequel
l’en appelloit missire
Loÿs Clifort et avoit dessoubz luy trente lances et cent
archiers.
SHF 3-141 sync
Comment le duc de Lancastre et ses
gens chevauchoient vers la cité de Besances et comment ceux de Besances compenserent a eulx et comment la duchesse et sa fille allerent
veoir le roy et la royne de Portingal. XLV.
Or se departit le duc de Lancastre et toutes gens. Rien ne demeura
en la
garnison fors ceulx qui ordonnéz y estoient a demeurer et chevaucherent
le duc et la duchesse devers la cité de Besances. C’est a l’ung des corps
de
Galisse la derreniere bonne ville au lés devers le
royaulme
de Portingal et ou droit chemin
du port de Connimbres. Et pour ce que madame de Lancastre et sa fille devoient
aller voir le roy et la royne, tindrent elles le chemin. Ceulx de Besances
entendirent que le duc venoit sur eulx o tout son ost, si se trairent a conseil
pour savoir quelle
chose ilz pouroient faire. En leur conseil eut pluseurs parolles
retournees,
finablement ilz ordonnerent et pour le mieulx qu’ilz envoierent devers
le duc et la
duchesse qui venoient six de leurs hommes des plus notables de leur
ville de Besances en souffrance de non estre assallyé huyt jours tant
seullement,
ilz envoierent devers le roy de Castille et luy remonstroient que s’il ne
venoit si
fort que pour combatre le duc,
il se rendroient au duc quictement sans
nul moyen.
Lors monterent sur chevaulx six hommes qui esleuz y furent de
la ville de Besances
et chevaucherent le droit chemin que les
Anglois venoient. Sy encontrerent premierement
l’avangarde que le mareschal
menoit. Ilz furent prins et arrestéz des premiers
chevaucheurs. Ilz disdrent
qu’ilz estoient de
Besances et que sur bon appointement
chargéz de la ville ilz aloient parler au duc. Adonc dist le mareschal a
missire
Jean Soustree, qui chevauchoit deléz luy: "Menéz
ses hommes devers
monseigneur. Ilz ont bien
mestier d’estre conduitz car noz archiers les peuroient
occirre." Le chevalier
respondit: "Voulentiers." A ces parolles dist le mareschal: "Aléz, aléz!
Ce chevalier vous menera au duc." Lors se departirent ilz et
chevaucherent
pb 165 v