pb 248 v
de France, et plus chier le auroient il a marier en
Baviere que ailleurs, car les Baviers anciennement
ont toudis esté du conseil de France. A ces parolles
avoit respondu le duc Frederich et que dit que nenny,
mais son freres aisnéz le duc Estienne de Baviere
en avoit une belle. "Et de quel eage?" respondirent les
oncles du roy. "Entre XIII et XIIII", respondit le duc
Frederich. Dont dirent les oncles du roy : "C’est tout
ce qu’il nous fault. Vous retourneréz en Baviere, en
parléz a vostre frere et amenéz vostre cousine en pelerinage
a Saint Jehan d’Amiens, et le roy sera contre elle. Se
il la voit, espoir l’acolleral il. Car il voit voulentiers
toutes belles femmes et si les ayme. Et, si elle lui chiet
en cueur, elle sera royne de France." Ainsi alloient les
premieres convenences, ne plus n’y eut dit ne fait. Et
n’en savoit le roy de France nient que on eust parlé
de son mariaige. Et quant le duc Frederich fut retourné
en Baviere, il remonstra toutes ces parolles a son frere
le duc Estienne de Baviere, qui pensa moult longuement
sus, et lui respondit : "Beau frere, je croy bien qu’il soit
ainsi que vous me dictes, et ma fille seroit bonne
euwreuse, se elle pouoit escheoir ne venir a si haulte
honneur comme d’estre royne de France. Mais il y a
moult loingtain chemin de icy, et si y a grant regard
a faire une royne et femme de roy. Si seroye trop
courroucé, se on avoit mené en France ma fille, et
puis elle me feust renvoyee. Je ay asséz plus chier que
je la marie a mon aise devers moy." Ce fut la
responce que le duc Estienne avoit donné a son frere,
de quoy le duc Frederich se contenta asséz, et en
avoit avecques sur celle forme escript aux oncles
du roy, a son oncle le duc Aubert et a madame de
Brabant, ausquelx il en avoit parlé a son retour.
Et cuidoient bien qu’on eust mis en nonchaloir toutes
ces choses. Et aussi on parloit du mariaige du roy
ailleurs, et si fut le roy asséz tost accordé a la fille
du duc de Lorraine, car elle estoit moult belle
damoiselle et de son age ou asséz pres, et de grant
et noble generacion de ceulx de Bloix. Et aussi fut
parlé de la fille le duc de Lenclastre, qui puis fut
royne de Portingal, mais on n’y pouoit trouver
nul bon moien pour leur guerre, si convint la pb 249 r