sodomite et mesmement du roy. Quant la feste fut passee le dit monsigneur Hue le Despensier, qui point n’estoit améz la endroit, fut admené pardevers la roine et tous les barons et chevaliers qui la estoient assembléz. La lui furent recordéz tous les faiz par escript que oncques il ne dist riens a l’encontre, si que la endroit il fut jugié par pleine suite des barons et chevaliers a justicier par tele maniere comme vous orréz. Car premierement il fut trahiné sur un bahut ad trompes et trompettes par toute la bonne ville de Harefort, de rue en rue. Et puis fut admené en une grant place en la ville, la ou le peuple estoit assemblé. ¶ La endroit il fut lié sur une aisselle hault, si que chascun, petit et grant, le pouoit bien veoir. Et avoit on fait en la dicte place pb 13 v