pb 100 r
frere, cousin germain du dit roy, le conte de Cancarville, messire Ernoul d’Audrehen,
mareschal de France, et plusieurs autres jusques au nombre dessusdit. Et vint droit au chastel
de Rouen par l’uys de derriere sans entrer en la ville. Et trouva en la salle du dit chastel assis
au disner Charles, son aisné filz, duc de Normandie, Charles, roy de Navarre, Jehan, conte de
Harecourt, les seigneurs de Preaulx, de Graville et de Clere et plusieurs autres. Et la fist le roy de
France prendre les dis roy de Navarre, le conte de Harecourt, les seigneurs de Preaulx et de Clere,
messire Loÿs et messire Guillaume de Harecourt, freres du dit conte, monseigneur Friquet de Friquant,
le sire de Tournebu, monseigneur Manbue de Mamesmares et deux escuiers, Colinet
Doublet et Jehan de Bantabu, et aucuns aultres. Si les fist emprisonner en diverses
chambres de ce chastel, pour ce que depuis la reconciliation faicte de la mort messire
Charles, connestable de France, le roy de Navarre avoit machiné et traicté plusieurs
choses ou dommage, deshonneur et mal du roy de France et de son royaulme. Et le
conte de Harecourt avoit dit ou chastel de Rueil ou estoit faicte assemblee pour
faire aide au roy de France plusieurs injurieuses parolles contre le roy en destourbant
a son pouoir icelle aide estre accordee. Puis alla disner le roy de France. Et aprés
monta a cheval et ceulx de sa route et alerent en ung champ derriere le chastel
appellé le Champ du Pardon. Et la fist mener le roy en deux charettes les dis conte de
Harecourt, le seigneur de Graville, monseigneur Manbue et Colinet Doublet. Et illec leur
furent les teses coupees. Aprés furent tous quatre traynéz jusques au gibet de
Rouen et la furent pendus et leurs testes mises sur le gibet. Ce jour et l’endemain
delivra le roy de France tous les autres excepté trois, c’est assavoir le roy de Navarre,
qui fu mené a Paris en prison au Louvre et depuis fu mis en Chastellet. Et lui
furent bailliés aucuns du conseil du roy de France pour le garder. Les dis Friquet et
Bantabu furent aussi emprisonnés en Chastellet. Et pour ce monseigneur Philippe de Navarre
tint plusieurs chasteaulx que le roy de Navarre, son frere, avoit en Normandie. Et ja soit
ce que le roy de France mandast au dit monseigneur Philippe qu’il lui rendist les dis chasteaux,
toutesvoies ne le vouloit il pas faire mais assemblerent il et monseigneur Godefroy
de Harecourt plusieurs ennemis du dit roy de France qu’ilz firent venir ou païs
de Constantin, lequel païs ilz tindrent contre le roy de France et ses gens. GCF 6-17 sync Le
mercredi aprés Pasques l’an mil IIIC LVI messire Ernoul d’Audrehen, mareschal
de France, alla en la ville d’Arras. Et illecques saigement et sans effort de
gens d’armes fist prendre plus de cent prisonniers de ceulx qui la ville avoient
mise en rebellion et murtry plusieurs des gros bourgois. Et l’endemain
fist couper les testes a vint de ceulx. Et les autres fist tenir en prison jusques
a ce que le roy en eust aultrement ordonné. Et par ce fu mise la ville en vraie obeissance
du roy. GCF 6-18 sync Ou moins de juing ensuivant descendi le duc de Lencastre en Constantin et
se mist avec messire Philippe de Navarre et messire Godefroy de Harecourt. Si estoient
environ IIIIM combactans. Si chevaucherent a Lisieux, au Bec, au Pont Audemer
et refreschirent le chastel qui avoit esté assegié par plus de deux mois mais monseigneur
Robert de Hotetot, maistre des arbalestriers de France, qui avoit tenu le siege avec
plusieurs nobles et autres, s’estoit parti du siege quant il sceut la venue du duc
de Lencastre et avoit laissé ses engins et son artillerie et ceulx du chastel prindrent pb 100 v